Ikipe y’Igihugu y’u Rwanda, Amavubi, ikomeje kwandika amateka mu rugendo rwo gushaka itike y’Igikombe cya Afurika cya 2027 (AFCON 2027), itsindira Cap-Vert iwabo ibitego 2-1 mu mukino wabereye kuri Estádio Nacional Tubarões Azuis ku mugoroba wo kuri uyu wa Kabiri tariki 29 Nzeri 2026.
Uyu mukino watangiye ahagana saa 18:00 z’ umugoroba ku isaha yo mu Rwanda akaba ari saa 15:00 z’ umugoroba muri Cap Vert. Kumpande zombi amakipe yatangiye umukino ashaka amanota atatu, nu bwo ahagana k’ umunota wa 40 Ikipe ya Cap Vert yaje gufungura amazamu itsinda igitego cyambere ibifashijwemo na Gilson Benchimol Tavares.
Ikipe y’ igihugu Amavubi ntiyigeze icika intege yakomeje gukoresha imbara nyinshi ishaka igitego cyo kwishyura. Mbere y’uko igice cya mbere kirangira, ahagana k’ umunota wa 45 ubwo umusifuzi wo hagati yari amaze gushyiraho iminota 2 y’ inyongera Niyomugabo Claude yishyuriye Amavubi igitego cyiza ku ishoti rikomeye, amakipe yombi ajya kuruhuka anganya igitego 1-1.
Mu gice cya kabiri, Amavubi yakomeje gusatira, maze ku munota wa 51, Iradukunda Elie Tatou atsinda igitego cya kabiri nyuma y’umupira mwiza yari ahawe na Joy-Lance Mickels, biba ibitego 2 by’ Ikipe y’ igihugu Amavubi kuri 1 ki Ikipe ya Cap Vert.
K’ umukino ubanza Ikipe y’ igihugu Amavubi Yatsinze Ikipe y’ igihugu ya Liberia ibitego 3-1 ihakura amanota atatu. Iyi ntsinzi yatumye Amavubi yuzuza amanota atandatu kuri atandatu nyuma y’ uko atsinze imikino ibiri ikurikirana biyaha kuyobora Itsinda K by’ agateganyo. U Rwanda rufite umusaruro mwiza w’ibitego, ibi bikomeza kurwongerera amahirwe yo kwitabira igikombe cya Afurika cya 2027.
Abakinnyi b’Amavubi bagaragaje ubufatanye n’ ubudasa mu kibuga, gukina bafite icyizere no gukorera hamwe, ibintu byashimwe n’abafana ndetse n’abayobozi batandukanye. Nyuma y’umukino, ubutumwa bwo kubashimira bwakomeje gukwirakwira ku mbuga nkoranyambaga, bubashishikariza gukomeza uwo murava.
Minisitiri wa Siporo Nelly Mukazayire mu butumwa yageneye Ikipe y’ igihugu Amavubi Yagize ati “Mwakoze gukotana mukagaragaza ko muri bato batari gito. Mukomereze aho, murashoboye kandi murashyigikiwe. Mukomezanye ishyaka, ikinyabupfura no kudateshuka ku ntego ya AFCON 2027 kugira ngo u Rwanda rweme.”
Mu mikino itaha iteganyijwe mu kwezi k’Ugushyingo, Amavubi azahura na Mali mu mikino ibiri mu rugendo rwo gushaka itike ya CAN 2027. Hagati aho, Mali iracakirana na Liberia mu wundi mukino wo muri iri tsinda. Abanyarwanda bafite icyizere ko nibakomeza muri uyu murongo, inzozi zo kuzabona u Rwanda rwitabira Igikombe cya Afurika cya 2027 zizaba zegereje kuba impamo.
YANDITSWE NA HAKIZIMANA ZAWADI
