Recording Academy yatangaje impinduka zikomeye zizakurikizwa muri Grammy Awards 2027, zirimo ibyiciro bitanu bishya, kuvugurura amategeko ya Best New Artist no guha uruhare runini abanditsi b’indirimbo n’abahimbyi.

Ikigo cya Leta Zunze Ubumwe za Amerika gishinzwe gutegura no gutanga ibihembo bya Grammy Awards, Recording Academy, cyatangaje impinduka nshya zizatangira gukurikizwa mu nshuro ya 69 y’ibihembo bya Grammy Awards, biteganyijwe gutangwa ku wa 7 Gashyantare 2027.

Izi mpinduka zirimo kongera ibyiciro by’ibihembo, guhindura amategeko agenga icyiciro cya Best New Artist, kuvugurura uburyo abanyamuryango batora ndetse no kongera agaciro k’abanditsi b’indirimbo n’abahimbyi.

Ibyiciro byose bya Grammy Awards byageze ku 100, umubare wari uheruka kubaho mu 2012, ubwo Recording Academy yagabanyaga ibyiciro bivuye kuri 109 bikagera kuri 78. Kuva icyo gihe, byagiye byiyongera buhoro buhoro kugeza ku mubare mushya wa 100.

Best New Artist yongerewe amahirwe

Imwe mu mpinduka zikomeye ni iyakozwe ku mategeko agenga icyiciro cya Best New Artist, gihatanirwa n’abahanzi baba barimo kuzamuka no kwigaragaza ku rwego mpuzamahanga.

Mbere, umuhanzi watangwaga muri iki cyiciro inshuro eshatu atabashije kwegukana igihembo yahitaga atemererwa kongera guhatanamo.

Amategeko mashya yongereye uwo mubare, aho umuhanzi ashobora gutangwa inshuro enye mbere yo kutemererwa kongera guhatanira iki gihembo.

Ibi byahaye amahirwe mashya abahanzi barimo Ella Langley, Megan Moroney, Ken Carson na Ravyn Lenae, bari bamaze gutangwa inshuro eshatu. Itsinda rya Geese n’umuririmbyi waryo Cameron Winter na bo bari mu bungukiye kuri izi mpinduka.

Umuyobozi Mukuru wa Recording Academy, Harvey Mason Jr., yavuze ko izi mpinduka zishingiye ku kuba uburyo abahanzi bubaka umwuga wabo bwarahindutse. Yasobanuye ko muri iki gihe abahanzi bashobora kumara imyaka myinshi basohora umuziki mbere yo kugera ku rwego rubaha amahirwe yo kumenyekana ku rwego mpuzamahanga.

Hagiyeho ibyiciro bishya bitanu

Muri izi mpinduka harimo ibyiciro bitanu bishya bizajya bihatanirwamo ibihembo.

Best Asian Pop Music Performance

Iki cyiciro kizibanda ku ndirimbo za Pop zishingiye ku masoko yo muri Aziya, zirimo K-Pop, J-Pop na C-Pop.

Indirimbo izaba igomba kuba ikoresha mu buryo bugaragara nibura rumwe mu ndimi zo muri Aziya. Indirimbo iri mu Cyongereza gusa ntizemerewe guhatanira iki cyiciro, ahubwo izakomeza guhatanira ibindi byiciro bya Grammy.

Recording Academy ivuga ko iki cyiciro cyashyizweho mu rwego rwo guha agaciro uruhare rukomeye umuziki wo muri Aziya umaze kugira ku isoko ry’umuziki ku Isi.

Best Latin Song

Hazashyirwaho kandi icyiciro cya Best Latin Song, kizajya gihemba abanditsi b’indirimbo zanditswe ahanini mu rurimi rw’Icyesipanyoli.

Indirimbo izaba igomba kuba nibura 51% by’amagambo yayo ari mu Cyesipanyoli kugira ngo yemererwe guhatanira iki gihembo.

Iki gihembo kizajya gihabwa abanditsi b’indirimbo, aho guhabwa abaririmbyi, keretse igihe umuririmbyi na we yaba yaragize uruhare mu kwandika indirimbo.

Best R&B Collaboration or Duo/Group Performance

Mu muziki wa R&B hiyongereyeho icyiciro cya Best R&B Collaboration or Duo/Group Performance, kizajya gihemba indirimbo zakozwe n’abahanzi bafatanyije cyangwa amatsinda.

Kubera izo mpinduka, icyiciro cyari gisanzwe cyitwa Best R&B Performance cyahinduriwe izina kiba Best R&B Solo Performance, kugira ngo gitandukanye n’icyiciro gishya.

Best Traditional Pop Vocal Performance

Iki cyiciro kizajya gihemba ibikorwa bya Pop gakondo, birimo indirimbo zishingiye ku bihangano byo mu bihe byashize cyangwa bifite uburyo bwihariye bwo kuririmba butandukanye na Pop y’iki gihe.

Best Traditional Folk Album

Mu muziki wa Folk na ho hiyongereyeho Best Traditional Folk Album.

Hagati aho, icyiciro cyari gisanzwe cyitwa Best Folk Album cyahinduriwe izina kiba Best Contemporary Folk Album, hagamijwe gutandukanya Folk gakondo n’umuziki wa Folk wo muri iki gihe.

Abanyamuryango bazahabwa ububasha bwagutse mu gutora

Recording Academy yanahinduye uburyo abanyamuryango bayo bazajya batanga amajwi.

Hifashishijwe gahunda nshya yiswe Ballot Plus, bamwe mu banyamuryango bazajya bemererwa gutora mu byiciro bigera kuri 15, bitewe n’ubunararibonye n’uruhare bafite mu nganda z’umuziki.

Mbere, benshi mu banyamuryango bari bemerewe gutora mu byiciro 10 gusa, mu rwego rwo gukomeza gutuma buri munyamuryango atora mu byiciro afitemo ubumenyi n’ubunararibonye.

Album zizajya zemerewe nubwo indirimbo nshya ari nke

Hari kandi impinduka ku mubare w’indirimbo nshya zigomba kuba kuri album kugira ngo yemererwe guhatanira Grammy.

Uyu mubare wagabanyijwe uva kuri 75% ukagera kuri 66%.

Recording Academy ivuga ko iyi mpinduka izafasha abahanzi benshi, cyane cyane muri iki gihe aho abahanzi benshi babanza gusohora indirimbo imwe imwe igihe kirekire mbere yo kuzishyira hamwe kuri album.

Abanditsi b’indirimbo n’abahimbyi bahawe agaciro gakomeye

Mu zindi mpinduka, abanditsi b’indirimbo n’abahimbyi bazajya bahabwa ibihembo bya Grammy ku rwego rumwe n’abatunganya amajwi n’abandi bahanga mu by’amajwi ku ma-album atsinda mu byiciro bitandukanye.

Iyi mpinduka yagaragaye nk’ingenzi mu kongera kugaragaza uruhare rw’abanditsi n’abahimbyi mu gutuma ibihangano by’umuziki bigera ku bakunzi kandi bigakomera ku isoko.

Album zisohoka online gusa na zo zahawe amahirwe

Recording Academy kandi yemereye albums zisohoka ku mbuga za internet gusa guhatanira ibihembo bya Best Album Notes na Best Historical Album.

Mbere, ibi byiciro byasabaga ko album iba yarasohotse mu buryo busanzwe, ariko amategeko mashya azafasha ibihangano bisohoka mu buryo bwa digital kubona amahirwe angana n’ibindi.

Muri rusange, impinduka zatangajwe na Recording Academy zigaragaza uburyo Grammy Awards ikomeje kuvugurura amategeko yayo kugira ngo ajyane n’iterambere ry’inganda z’umuziki ku Isi.

Grammy Awards 2027 izaba ku wa 7 Gashyantare 2027, aho abahanzi n’abakora mu nganda z’umuziki bazaba bahataniye ibihembo hakurikijwe amategeko mashya.