Kuri uyu wa Kane, mu Mirenge yose igize Akarere ka kayonza hizihirijwe Umunsi Mpuzamahanga w’Umugore wo mu Cyaro, ku nsanganyamatsiko igira iti “Uruhare rw’umugore wo mu cyaro mu nzego zifata ibyemezo: umusingi w’impinduka zirambye.” Ku rwego rw’Akarere ibi birori biri kwizihirizwa mu Murenge wa Mwiri, mu Kagari ka Migera.
Umuyobozi w’Akarere w’Agateganyo, Fred Hategekimana ari kumwe n’Itsinda ry’Abadepite muri bari mu ihuriro rya #FFRP n’abafatanyabikorwa batandukanye bifatanyije n’abagore mu kwizihiza uyu munsi, wabanjirijwe no gusura ibikorwa by’abagore biteje imbere.
Hon. MUKARUGWIZA Judith Umudepite mu nteko ishinga amategeko yasabye abagore gukomeza kwimakaza indangagaciro z’umuco nyarwanda, zirimo ubumwe n’ubudaheranwa, gukunda Igihugu, kwirinda amakimbirane yo mu ngo no gufatanya n’abagabo kurera abana babatoza umuco wo kuganira mu muryango, kubahana no kwimakaza ihame ry’uburinganire.
Yagize ati “Iterambere ry’umugore wo mu cyaro ni inshingano dusangiye, haba inzego za Leta iz’ibanze, abikorera n’abafatanyabikorwa. Abagore bakwiye gukomeza koroherezwa kubona amakuru n’amahirwe atandukanye, arimo ay’ikoranabuhanga, imari, amasoko, ubumenyi n’ibindi bibafasha kwiteza imbere no kugira uruhare rufatika mu iterambere ry’imiryango yabo n’iry’Igihugu muri rusange.”
YANDITSWE NA UZABAKIRIHO CHARLES
