Itsinda rya Moriox Kids kuri uyu wa kabiri tariki 1 Nzeri ryerekeje muri Kyrgyzstan, aho ryatumiwe kuzatarama mu birori byo gusoza Imikino Mpuzamahanga y’Abimukira ku Isi izwi nka World Nomad Games 2026 uteganyijwe kuba kuwa 6 Nzeri 2026.
Ibi birori bizabera muri Hippodrome ya Cholpon Ata, bizahuza abahanzi, amatsinda ,n’imbyino zitandukanye n’abandi bakora imyidagaduro baturutse mu bihugu bigiye bitandukanye.
Iyi mikino ya World Nomad Games 2026 iri kubera muri Kyrgyzstan yatangiye ku wa 31 Kanama iteganyijwe kurangira ku wa 6 Nzeri 2026. Iyi mikino ihuza ibihugu bisaga 89, ikaba igamije kwimakaza no kumenyekanisha umuco, imyidagaduro n’imikino gakondo y’abaturage b’ibihugu bitandukanye.
Umuhango wo gufungura iyi mikino wabereye mu murwa mukuru wa Bishkek, mu gihe amarushanwa menshi ari kubera mu gace ka Issyk-Kul. Muri yo harimo imikino gakondo irimo Kok Boru, kurasana hakoreshejwe umuheto gakondo, gukirana n’indi ikinwa hakoreshejwe amafarashi, byose bigaragaza imico itandukanye y’abaturage b’abimukira baturuka mu bihugu bitandukanye.
Moriox Kids niryo tsinda ryambere ryo mu Rwanda rigiye kwitabira igitaramo gisoza iyi mikino bityo bikaba amahirwe akomeye kuri iri tsinda ndetse n’ Abanyarwanda muri rusange rizakomeza kumenyekanisha umuco n’impano za abana bu Rwanda ku rwego mpuzamahanga.
YANDITSWE NA HAKIZIMANA ZAWADI
