Kuri uyu wa Kabiri taliki 06 Ukwakira 2026 mu Mirenge yose y’ akarere ka Ngoma hateraniye inteko z’abaturage zahujwe n’igikorwa cyo gutangiza ku mugaragaro ukwezi kwahariwe uruhare rw’umuturage mu igenamigambi, kwakira ibyifuzo by’abaturage bizashyirwa mu igenamigambi ry’ingengo y’imari y’umwaka wa 2027/2028.

Ku rwego rw’ akarere ka Ngoma Iki gikorwa cyatangirijwe mu Murenge wa Kibungo, cyitabirwa n’ Umuyobozi w’Akarere wungirije ushinzwe iterambere ry’ubukungu Bwana MAPAMBANO Cyriaque aho yagaragarije abaturage bimwe mu bikorwa by’ingenzi byagezweho, birimo kubaka imihanda ya kaburimbo mu Mujyi wa Kibungo, kubaka Ikigo Nderabuzima cya Rubona, kubaka Stade ya Ngoma, kugeza amashanyarazi ku ngo zirenga 120, n’ibindi bikorwa bigamije guteza imbere imibereho n’ubukungu by’abaturage.
Yashimangiye ko uruhare rw’umuturage ari ingenzi mu igenamigambi, kuko abaturage aribo bazi neza ibibazo n’ibyifuzo byabo bishobora kubafasha kwihuta mu iterambere. Yasabye abaturage gukomeza gutanga ibyifuzo bifite akamaro rusange kandi byashyirwa mu bikorwa hagendewe ku byihutirwa. Yagize ati: “Igenamigambi ryiza ritangirira ku bitekerezo n’ibyifuzo by’abaturage. Ni ngombwa ko mutanga ibitekerezo ku bikorwa mubona ko bikenewe kandi bizagira uruhare mu guteza imbere imibereho myiza yanyu.”

Abaturage b’Umurenge wa Kibungo bishimiye uburyo bahawe umwanya wo kugaragaza ibyifuzo byabo, bavuga ko iyi gahunda ibafasha kugira uruhare mu gufata ibyemezo bireba iterambere ry’aho batuye. Basabye ko ibyifuzo byatanzwe bikomeza gukurikiranwa no guhabwa umwanya mu igenamigambi.

YANDITSWE NA UZABAKIRIHO CHARLES