Umutoza w’ ikipe y’ igihugu Amavubi Stephen Constantine yashyize kumugaragaro urutonde rw’agateganyo rw’abakinnyi b’ikipe y’igihugu, Amavubi, bazayifasha mumikino yo gushaka itike y’Igikombe cya Afurika cya 2027 (AFCON 2027). U Rwanda ruri mu Itsinda K, aho ruzacakirana na Liberia ndetse na Cap-Vert mu mikino ya mbere y’iri rushanwa.
Umutoza mukuru w’Amavubi, Stephen Constantine, yahisemo abakinnyi baturuka mu makipe atandukanye yiganjemo ayo mu Rwanda no hanze yarwo, aba bakinnyi baratanga ikizere mu kubaka ikipe ikomeye izabasha guhatanira itike yo kwerekeza mu gikombe cya Afurika.
Mu izamu, Constantine yahamagaye Patient Niyongira, Adolphe Hakizimana, Fiacre Ntwari na Yves Mugisha, bose bazarwanira umwanya wo kurinda izamu ry’Amavubi.
Mu bwugarizi, higanjemo amazina amenyerewe arimo Ange Mutsinzi, Clement Niyigena, Phanuel Kavita na Darryl Nkulikiyimana Nganji, mu gihe ku mpande z’ubwugarizi hahamagawe Emmanuel Imanishimwe, Leroy Mickels, Noam Emeran, Claude Niyomugabo, Jojea Kwizera, Jean Gilbert Byiringiro, Obed Uwumukiza na Gilbert Mugisha.
Hagati mu kibuga hagaragaramo abakinnyi bafite ubunararibonye barimo Djihad Bizimana, Bonheur Mugisha, Samuel Gueulette, Hakim Hamis, Keddy Nsanzimfura na Kevin Muhire, bazaba bafite inshingano zo kuyobora umukino no gufasha ba rutahizamu.
Mu busatirizi, umutoza yahisemo Innocent Nshuti, Taiba Mbonyumwami, Abeddy Biramahire, Joy Lance Mickels, Fidal Uwiyaremye na Slayd Mickles, bose bafite inshingano zo gushaka ibitego bizafasha Amavubi kubona intsinzi.
Iyi kipe igizwe n’abakinnyi bakina muri shampiyona zitandukanye zirimo izo mu Rwanda, u Bubiligi, u Budage, u Busuwisi, Malta, Ethiopia, Libya, Sudani, Algeria n’ahandi, ibintu bigaragaza ko Amavubi afite uruvange rw’abakinnyi bafite uburambe kandi bitezweho umusaruro mwiza.
Abanyarwanda bafite icyizere ko aba bakinnyi bazitwara neza mu mikino izahuza Amavubi na Liberia ndetse na Cap-Vert, bakabona umusaruro mwiza uzabafasha gutangira neza urugendo rwo gushaka itike y’Igikombe cya Afurika cya 2027.
YANDITSWE NA HAKIZIMANA ZAWADI
