Rwanda Premier League (BK Pro League) yatangaje imyanzuro mishya igomba kugenga umwaka w’imikino wa 2026/27, irimo uko amakipe yo muri Sudani azitabira Shampiyona y’u Rwanda ndetse n’uburyo azahabwa ibihembo mu gihe yaba yitwaye neza.
Iyi myanzuro yemejwe kuri iki Cyumweru tariki ya 23 Kanama 2026, mu nama rusange yahuje abanyamuryango 16 ba Rwanda Premier League yabereye muri Four Points by Sheraton i Kigali. Yagarutse ku ngingo zitandukanye zirimo ingengo y’imari y’uyu mwaka, amategeko agenga amakipe yo muri Sudani ndetse n’umubare w’abanyamahanga bemerewe gukina.
Kimwe mu byafashweho umwanzuro ni uko mu gihe ikipe yo muri Sudani, yaba Al Hilal SC cyangwa Al Merrikh SC, yarangiza shampiyona iri ku mwanya wa mbere, itazahabwa igikombe cya Shampiyona y’u Rwanda nk’ikipe yegukanye irushanwa, ahubwo izahabwa igikombe cy’icyubahiro (Honorary Trophy). Igikombe nyir’izina cya BK Pro League kizahabwa ikipe y’u Rwanda izaba yarasoje iri ku mwanya wa mbere mu makipe 16 y’Abanyarwanda.
Uyu mwanzuro uje gukuraho urujijo rwabayeho mu mwaka ushize, ubwo Al Hilal SC yari yararangije irushanwa iri ku mwanya wa mbere igahabwa igikombe cya Shampiyona, mu gihe APR FC nayo yari yabaye iya mbere mu makipe y’u Rwanda igahabwa ikindi gikombe. Icyo gihe benshi bibajije impamvu shampiyona imwe yagize ibikombe bibiri, bituma ubuyobozi bwa BK Pro League bufata icyemezo cyo gushyiraho umurongo usobanutse Kandi uzakurikizwa muri uyu mwaka w’ imikino.
Nubwo amakipe yo muri Sudani atazegukana igikombe cya BK Pro League, azakomeza guhabwa uburenganzira bungana n’ubw’andi makipe mu bijyanye n’ibihembo by’imikino. Azajya ahabwa amafaranga y’intsinzi ibihembo by’umukinnyi wahize abandi ku mukino, ndetse n’ibihembo bihabwa abakinnyi bitwaye neza mu mpera z’umwaka w’imikino.
Ku bijyanye n’ingengo y’imari, abanyamuryango bemeje ko BK Pro League izakoresha miliyari imwe na miliyoni 280 n’ibihumbi 55 by’amafaranga y’u Rwanda (1,280,055,000 Frw) mu mwaka w’imikino wa 2026/27. Aya mafaranga azifashishwa mu bikorwa bitandukanye byo gutegura no guteza imbere shampiyona.
Hari kandi umwanzuro wafashwe ku mubare w’abakinnyi b’abanyamahanga bemerewe gukinira amakipe yo muri Sudani. Aya makipe yemerewe gushyira ku rupapuro rw’umukino abakinnyi batarenze umunani batari Abanya-Sudani, mu gihe mu kibuga icyarimwe hatagomba kujyamo abarenga batandatu. Ibi byakozwe nyuma y’ubusabe bw’Ishyirahamwe ry’Umupira w’Amaguru muri Sudani.
Ku makipe y’u Rwanda, amategeko asanzwe akomeza kubahirizwa, aho yemerewe kugira abanyamahanga umunani ku rupapuro rw’umukino, hakurikijwe amabwiriza agenga shampiyona.
Iyi myanzuro izafasha gukuraho urujijo rwari rwarabayeho mu mwaka ushize, basobanuye neza uko amakipe yo muri Sudani azitabira BK Pro League mu gihe igihugu cyabo kigifite ibibazo by’umutekano byatumye yakirira imikino yayo mu Rwanda.
Umwaka w’imikino wa 2026/27 utegerejwe n’abakunzi b’umupira w’amaguru mu Rwanda, aho hazaba hitezwe kureba uko aya makipe yo muri Sudani azitwara, ndetse n’uko amakipe y’u Rwanda azahangana mu guharanira kwegukana igikombe cya BK Pro League. YANDITSWE NA HAKIZIMANA ZAWADI
