Igikombe cy’Isi cya Hockey cya 2026 kiri kubera mu Bubiligi no mu Buholandi cyamaze kwandika amateka ku mbuga nkoranyambaga, nyuma y’uko amashusho ajyanye n’iri rushanwa amaze kurebwa n’abantu barenga miliyoni 106.
Ishyirahamwe Mpuzamahanga ry’Umukino wa Hockey (FIH) ryatangaje kuri uyu wa 24 Kanama 2026 ko iri rushanwa rimaze kugira uruhare rukomeye mu kumenyekanisha Hockey no kugera ku bantu bashya hirya no hino ku Isi.
Mu mibare yashyizwe hanze na FIH, Instagram ni yo iza ku isonga, aho amashusho ajyanye n’Igikombe cy’Isi amaze kurebwa inshuro zirenga miliyoni 66.7. Ikurikirwa na Facebook ifite miliyoni 32.6, TikTok ikagira miliyoni 4.5, mu gihe YouTube imaze kugira abarenga miliyoni 2.65 barebye amashusho y’iri rushanwa.
Abantu bashya batangiye gukurikirana Hockey
FIH yavuze ko igikomeye kuri iyi mibare atari ubwinshi bw’abantu barebye amashusho gusa, ahubwo ari n’uko abantu benshi batari basanzwe bakurikira Hockey batangiye kuwumenya no kuwukurikira.
Ku rubuga rwa Instagram rwonyine, FIH ivuga ko abantu barenga miliyoni 11 batari basanzwe bakurikira Hockey bagezweho n’ibikorwa by’Igikombe cy’Isi. Imibare kandi igaragaza ko 70.6% by’abagezweho n’ibyo bikorwa batari basanzwe bakurikira Hockey, mu gihe 62% bagize uruhare mu gusangiza abandi amashusho.
Na TikTok yakomeje kugira uruhare mu kugeza Hockey ku rubyiruko, aho amashusho y’iri rushanwa amaze kurebwa n’abarenga miliyoni 4.5.
Uburyo bushya bwo kumenyekanisha Hockey
FIH yavuze ko uyu musaruro waturutse ku buryo bushya yakoresheje mu gutangaza no kugaragaza iby’Igikombe cy’Isi.
Aho kwibanda gusa ku manota, ibisubizo n’ibyaranze imikino, FIH yongereye amashusho n’inkuru zigaragaza ubuzima bw’abakinnyi, abafana, ibikorwa byo hanze y’ikibuga, umuco w’ibihugu byakiriye irushanwa ndetse n’ibindi bikorwa bigize ubuzima bw’Igikombe cy’Isi.
Ibi byatumye abakurikira batabona Hockey nk’umukino gusa, ahubwo babona n’ibindi bikorwa n’inkuru ziwukikije.
Perezida wa FIH yashimye umusaruro w’iyi gahunda
Perezida wa FIH, Tayyab Ikram, yavuze ko iyi mibare ari ikimenyetso cy’uko gahunda bari barateguye yo kugeza Hockey ku bantu benshi yatanze umusaruro.
Yagize ati: “Twifuzaga kwereka isi ubuhanga bw’abakinnyi bacu, umwuka mwiza uri mu bibuga ndetse no gukurura abantu bashya muri Hockey.”
Yakomeje avuga ko kuba abantu benshi bagezweho n’ibikorwa bya FIH kandi batari basanzwe bakurikira uyu mukino ari ikimenyetso cy’uko Hockey ikomeje kugera ku bantu bashya.
Icyerekezo kizakomereza mu yandi marushanwa
FIH yavuze ko nubwo Igikombe cy’Isi cya 2026 kitararangira, umusaruro wabonetse ku mbuga nkoranyambaga uzakoreshwa no mu yandi marushanwa azategurwa n’iri shyirahamwe.
Riteganya gukomeza guhuza amashusho y’imikino, inkuru z’abakinnyi, ibikorwa by’abafana ndetse n’ubufatanye n’abafatanyabikorwa, mu rwego rwo gukomeza kumenyekanisha Hockey no kuyegereza abantu benshi ku Isi.
Kugeza ubu, Igikombe cy’Isi cya Hockey 2026 ntabwo kiri kwerekana gusa ko abantu benshi bakurikira uyu mukino, ahubwo kiri no gufasha abantu batari bawuzi kuwuvumbura no kuwukurikira binyuze ku mbuga nkoranyambaga.
YANDITSWE NA HAKIZIMANA ZAWADI
